Pakistan Political Talk Shows, Drama Serials, Khabar Naak,Hasb-e-haal: 03/18/15

پشاور میں 22 ستمبر 2013ء کوکوہاٹی گیٹ چرچ پر دو خودکش حملے ہوئے تو بغیر کسی مذہبی تفریق کے عوام کا جو رویہ تھا وہ دہشت گردوں کےلیے ایک کھلا پیغام تھا کہ “پشاورکے چرچ دھماکے میں تراسی پاکستانی عیسائی ہلاک ہوگئے، مسلمانوں اور دوسرئے مذاہب کے عام لوگوں نے اُن کے غم کو اپنا سمجھا اور آگے بڑھکر اُن کا ساتھ دیا، مساجد میں اعلانات ہورہے تھے کہ کالو محلے میں مدد کرنے پہنچو اور جو جوان ہیں وہ قبرستان پہنچیں تاکہ قبریں کھودی جاسکیں۔ یہ سارے مقامی لوگ اور جوان دھماکہ ہونے سے لیکر رات گئے تدفین تک لواحقین کے ہمراہ موجود رہے اور میتیں دفنا کر ہی اپنے گھروں کو لوٹے۔ مسلمانوں نے قبرستان پہنچ کر قبریں تیار کیں، مذہب اپنا اپنا مگر انسانیت زندہ ہے۔ اس سارئے عمل نے پاکستان کو اقلیت کی بنیاد پر تقسیم کرنے والوں کو منہ توڑ جواب دئےدیا ہے۔ اُو وحشی درندوں تم مسلمانوں کو مارو یا عیسائیوں کومگر یقین کرو دہشتگردوں تم انسانیت کو نہیں مار سکتے”۔

اتوار 15 مارچ 2015ء کو دہشت گردوں نے ایک مرتبہ پھر چرچ کو دہشت گردی کا نشانہ بنایا اورایک مرتبہ پھردہشتگرد کامیاب رہے۔ لاہور کے علاقے یوحناآباد میں فیروزپور روڈ پر واقع دو گرجاگھروں میں چند منٹ کے فرق سے دو دھماکے ہوئے۔ اتوارکی دعائیہ تقریبات جاری تھیں کہ اچانک ایک حملہ آور نے کیتھولک چرچ میں داخل ہوکر دعائیہ تقریب میں دھماکا کر دیا جبکہ دوسرے نے کرائسٹ چرچ میں داخلے کی کوشش میں ناکامی پر گیٹ پر دھماکا کیا۔ پندرہ مارچ کو یوحنا آباد میں دہشتگردی کے دو واقعات ہوئے، پہلا واقعہ جس میں دو دہشتگردوں نے دو گرجا گھروں پر خودکش حملے کیے اور نتیجے میں 17 افراد ہلاک اور 80 سے زیادہ افراد زخمی ہوگئے، جبکہ اُسی مقام پر جہاں لاشیں بکھری پڑی تھیں اور امداد کے منتظر زخمی آہ و بکاہ کررہے تھے پولیس کے قبضے سے دو افراد کو چھڑاکرلایا گیا اور مشتعل ہجوم کو بتایا گیا کہ یہ دہشتگردوں کے ساتھی ہیں، اسکے بعد اُن دو بےگناہ افراد کے ساتھ جو سلوک ہوا اسکو بدترین دہشتگردی سے کم کوئی نام دینا ناممکن ہے۔ دو عام انسانوں کو جو مسلمان تھے صرف اس لیے کہ اُن کے چہرئے پر داڑھی تھی دہشتگردوں کا ساتھی قرا دیکر پہلے مارا گیا اور پھر جلایا گیا، سوشل میڈیا پر دکھائی جانے والی تصاویر بے حسی اور درندگی کا منہ بولتا ثبوت ہیں۔ یوحنا آباد میں طالبان دہشتگرد نہ صرف دہشتگردی میں کامیاب رہے بلکہ مسلمانوں اور عیسائیوں کے درمیان فاصلے بھی بڑھ گئے۔

پاکستان کے وزیر داخلہ چوہدری نثار علی خان نے قومی اسمبلی میں بیان دیتے ہوئے کہاکہ ’گرجا گھر پر حملے بدترین دہشت گردی تھی لیکن دو انسانوں کو جس طریقے سے جلایا گیا یہ بھی بدترین دہشت گردی ہے۔‘ یوحنا آباد میں اتوار کو گرجا گھروں پر دو خودکش حملوں میں 17 افراد مارے گئے تھے اور ان کے بعد مسیحی برادری کے پرتشدد احتجاج میں دو افراد کو حملہ آوروں کے ساتھی ہونے کے شبے میں زندہ جلا دیا گیا تھا۔چوہدری نثار کا کہنا تھا کہ خودکش دھماکوں میں بھی جو 17 افراد ہلاک ہوئے ان میں سے 12 عیسائی اور پانچ مسلمان تھے۔چوہدری نثار نے کہا کہ ماضی میں اقلیتیں دہشت گردی کے بڑے واقعات کا نشانہ بنیں اور اس وقت ان کا صبر اور ضبط مثالی تھا، تاہم لاہور میں دھماکوں کے ردعمل میں جو ہوا اسے نظرانداز نہیں کیا جا سکتا۔ان کا کہنا تھا کہ لاہور میں ہونے والا ردعمل ملک، قانون اور جمہوریت کے لیے باعثِ تضحیک اور اس بات کی اجازت نہیں دی جا سکتی کہ ’ایک طرف دہشت گرد ہمارے گھروں کو آگ لگائیں اور پھر ہم نکل پڑیں اور خود یہ کام کریں۔‘ چوہدری نثار کے اس بیان سے کوئی اختلاف نہیں لیکن جب ریاستی حکمران اپنے فرائض بھول کر اقتدار میں اندھے، گونگے اور بہرے بن جائیں اور عدلیہ انصاف کو بھول کر حکومتی طبقہ کو تحفظ دے تو اس وقت ملک میں لاقانونیت کینسربنکر قوم کے خون میں تیزی سے پھیل جاتی ہے، اور یہ ہی لاقانونیت یوحنا آباد میں واضع طور پر دیکھی گئی۔

پیر 16 مارچ کی صبح یوحنا آباد کے ایک چرچ میں ایک دعائیہ تقریب سے خطاب کرتے ہوئے مسیحی برادری کے نمائندوں نے اس بات پر افسوس کا اظہار کیا کہ اس علاقے سے پارلیمانی انتخابات میں حصہ لینے والے موجودہ صوبائی وزیر اعلیٰ شہباز شریف نے متاثرہ علاقے کا دورہ کرنے کی بھی زحمت نہیں کی۔ یہ حلقہ شہباز شریف کا ہے مسیحیوں نے بھی انہیں ووٹ دیا ہو گا مگر ایک مسیحی روتے ہوئے کہہ رہا تھا ہمیشہ نواز شریف کی حکومت میں ہم زیادہ تکلیف میں ہوتے ہیں۔ ایک مقامی مسیحی رہنما سیمسن سلامت نے سانحہ یوحنا آباد کی شدید مذمت کرتے ہوئے دہشت گردی کے خاتمے کے لیے نیشنل ایکشن پلان پر مؤثر عمل درآمد کی ضرورت پر زور دیا۔ پرتشدد مظاہروں کے حوالے سے پوچھے گئے ایک سوال کے جواب میں اُن کا کہنا تھا کہ احتجاجی مظاہروں کا پرتشدد رنگ پاکستانی مسیحی برادری کے ماضی سے مطابقت نہیں رکھتا۔ ان کے بقول ہو سکتا ہے کہ کوئی قوت اپنے مقاصد کے لیے سانحہ یوحنا آباد کے احتجاج کو اپنی مرضی کا رخ دینے کے لیے کام کر رہی ہو۔ پاکستان میں انسانی حقوق کے کمیشن نے وفاقی اور صوبائی حکومتوں سے مطالبہ کیا ہے کہ وہ کسی بڑے سانحے سے بچنے کے لیے مذہبی اقلیتوں کے حقوق کی حفاظت کے لیے فیصلہ کن اقدامات کریں۔ اقوام متحدہ کے سیکرٹری جنرل بانکی مون نے یوحنا آباد میں گرجا گھروں پر ہونے والے حملوں کی شدید مذمت کرتے ہوئے حکومت پاکستان سے کہا ہے کہ وہ اقلیتوں کا تحفظ کرے اور ذمہ داروں کو فوری انصاف کے کٹہرے میں لایا جائے۔ پاکستان کی مسلمان اکثریت مسیحی سوگوار خاندانوں کے ساتھ ہے، وہ بھی مسلمانوں کا ساتھ دیں، اس وقت مسلمان بھی مظلوم ہیں اور پریشان ہیں۔ بم دھماکوں میں مسلمان سب سے زیادہ جاں بحق ہوئے ہیں۔

لاہور میں دو افراد کے زندہ جلاۓ جانے پر عام پاکستانی رنج اور غصہ میں ہے لیکن طالبان کے ہمدرد کچھ زیادہ ہی سیخ پا نظر آتے ہیں جو ابتک ہونے والی دہشت گردی اور تمام مظالم کا کسی نہ کسی طرح دفاع کرتے رہے ہیں ۔ لاہور میں دو افراد کا زندہ جلاۓجانا ایک انسانیت سوزفعل ہے، لیکن ایسا پہلی بار تو نہیں ہوا۔ اس سے قبل ایک مسیحی جوڑۓ کو بھٹے میں جلاۓ جانے کا واقعہ تو ابھی کل ہی کی بات ہے۔ جوزف کالونی میں جو کچھ ہوا وہ بھی ایک بھیانک تاریخ ہے۔ اس سے پہلے مسیحی برادری کے ساتھ جو کچھ گوجرہ میں ہوا وہ بھی ہمارۓ بدنما چہرۓ پر ثبت ہے۔لاہور میں جنہوں نے دو افراد کو زندہ جلایا اور جن طالبان دہشتگردوں نے گرجاگھروں پر دہشتگردی کی یلغار کی دونوں ہی جہنم کا ایدھن ہیں۔ لیکن طالبان کے ہمدرد جو دہشتگردی کے حامی رہے ہیں اچانک کیسے بیدار ہو گئے؟ آج اُنکو انسانیت بھی یاد آرہی ہے اورظلم کی تعریف بھی سمجھ میں آگئی۔ اس سے پہلے بھی یہ ہی سب کچھ ہوتا رہا ہے اور زیادہ تر نام نہاد ڈالرمجاہدین یہ فعل انجام دیتے رہے ہیں۔ یوحنا آباد کے دردناک واقعات پرہمیں اس بات کا اقرار بغیر اگر مگر آئیں بائیں شائیں کے کرنا اور سمجھنا ہوگا کہ نہ چرچ پر حملہ کرنے والے دہشتگرد حضرت محمد صلی الله علیہ وسلم کی تعلیمات سے واقف ہیں اورنہ ہی زنده بےگناہ انسانوں کوجلانے والے دہشتگرد حضرت عیسی علیہ اسلام کی تعلیمات سے۔ یہ نہ مسلمان ہیں اور نہ ہی عیسائی، یہ تو انسان کہلانے کے لایق بھی نہیں ہیں ، یہ درندئے ہیں درندئے۔

شیعہ سنی محاذ جنگ

بسم اللہ الرحمن الرحیم

شیعہ سنی محاذ جنگ

فرمان خداوندی ہے «وَاعْتَصِمُواْ بِحَبْلِ اللَّهِ جَمِيعَاً وَلَا تَفَرَّقُواْ» (سوره آل عمران: 103) کہ اے مسلمانو! اللہ کی رسی کو مضبوطی سے تھامے رہو اور تفرقے میں نہ پڑو۔ ہم مسلمان بھی عجیب قوم ہیں ایک وقت تھا کہ دنیا مسلمانوں کی محتاج تھی تمام علوم اور ٹیکنالوجی پر مسلمانوں کا راج تھا اور آج حالت یہ ہے کہ ہمارا موبائل یا کمپیوٹر چینی ساخت کا ہے اور ہم جو خبریں پڑھتے یا سنتے ہیں وہ اسرائیلی ساخت کی ہیں، ان اسرائیلی ساخت کی خبروں کے مطابق عراق اور شام میں شیعہ سنی لڑائی ہو رہی ہے سنی مسلمانوں نے شیعہ حکومتوں کے مظالم سے تنگ آ کر قیام کر دیا ہے اور اس میں بڑے پیمانے پر قتل عام کرنے کے بعد عراق اور شام کے ایک وسیع رقبے پر قابض ہو گئے ہیں اب پوری دنیا کے شیعہ مل کر ان کو شکست دینے کے لیے ان پر فوج کشی کر رہے ہیں

ان سنی مسلمانوں کی شکست کے پیش نظر علاقے میں موجود سنی حکومتیں شدید خطرے سے دوچار ہیں اس لیے سعودی عرب ترکی اور مصر آپس میں گٹھ جوڑ کر رہے ہیں کہ کس طرح اس طاقت سے نمٹا جائے جبکہ دوسری طرف ایران عراق اور شام اور لبنان کی پہلے سے ہی گٹھ جوڑ ہو چکی ہے

اس پورے منظر نامے میں امریکہ ایک مصلح کا کردار ادا کرنے کا دعویدار ہے امریکہ نے پہلے شام میں حکومتی مظالم سے تنگ سنی مسلمانوں کو اسلحہ اور ٹریننگ فراہم کی تاکہ علاقے میں ڈکٹیٹر شپ کو ختم کر کے جمہوری نظام لایا جائے جب ان امریکی تربیت یافتہ مسلمانوں نے شام میں عام شہریوں کا قتل عام شروع کیا تو پوری دنیا میں اس کے خلاف نفرت پھیلنے کے بعد امریکہ غیر جانبدار ہو کر تماشا دیکھنے لگا لیکن کچھ ہی دنوں کے بعد کیمیائی ہتھیاروں کے استعمال نے امریکہ کو دوبارہ اٹھنے پر مجبور کر دیا اور امریکہ شام میں لیبیا کی طرز کا حملہ کرنے کے لیے تیار ہو گیا لیکن روس اور ایران کی مداخلت پر اسے دوبارہ واپس بیٹھنا پڑا

پھر عسکری اور امریکی تربیت یافتہ گروہ نے جس میں اس وقت تک پوری دنیا سے سنی مجاہدین مل چکے تھے عراق پر حملہ کر دیا اور اس حملے میں ایک بڑے علاقے پر قبضہ کر لیا اور انسانی تاریخ کی بھیانک ترین قتل عام کی داستان رقم کی یہاں پر مذہبی جنگ نے تھوڑا عجیب رخ اختیار کیا سنی اکثریتی علاقے کردستان کے سنی مسلمانوں نے یہ خیال کر رکھا تھا کہ یہ گروہ بھی سنی مسلمان ہیں اور یہ شیعہ لوگوں سے بدلہ لینے آئے ہیں اس لیے ہمارے علاقے پر حملے یا قبضے کا کوئی خطرہ نہیں اس لیے انہوں نے اس سنی مسلمانوں کی جماعت کی مدد بھی کی تھی لیکن جب یہ سنی گروہ کردستان پر بھی چڑھائی کرنے لگا تو کردوں نے ان کا مقابلہ شروع کر دیا

یہاں امریکہ نے سنی مسلمان کردوں کا ساتھ دینے کا فیصلہ کیا اور ان کو جدید اسلحہ فراہم کرنا شروع کر دیا جو کہ غلطی سے ان کے مخالف سنی گروپوں کو بھی سپلائی ہوتا رہا۔ اس کے بعد امریکہ نے اپنے اتحادی ممالک کے ساتھ مل کر ان سنی مسلمانوں پر بمباری شروع کر دی جن کو اس نے خود تربیت دے کر شام میں بھیجا تھا۔

اب جب یہ سنی اتحاد شکست کھا رہا ہے اور شیعہ حکومتی افواج کے ساتھ کرد بھی انکو عراقی سرزمین سے واپس دھکیل رہے ہیں تو امریکہ نے سنی ممالک سعودی عرب ترکی اور مصر کی مدد اور حمایت کا عندیہ دیا ہے تاکہ ایک شیعہ الائینس سے مل کر مقابلہ کر سکیں یہ تو اسرائیلی ساختہ خبروں کی کہانی تھی اب ایک عام مسلمان کے ذہن میں پیدا ہونے والے سوالات کیا ہیں۔

کیا شیعہ اور سنی مسلمان ایک دوسرے کے خون کے پیاسے ہیں ؟

امریکہ شام میں شیعہ بادشاہ کی مخالفت جبکہ سعودی عرب میں سنی بادشاہ کی حمایت کیوں کرتا ہے؟ مصر میں سنی انقلاب کی مخالفت جبکہ فوجی ڈکٹیٹر کی حمایت کرتا ہے اور ایران میں بادشاہت کی حمایت کرتا تھا اب شیعہ جمہوری حکومت کی مخالفت کیوں کرتا ہے ؟ امریکہ شیعہ مسلمانوں کا ساتھی ہے یا سنی مسلمانوں کا ؟ مصر میں سنی مسلمانوں نے انقلاب برپا کیا اپنی جمہوری حکومت بنائی پھر ان پر ایک ڈکٹیٹر مسلط کیا گیا جس نے ہزاروں مسلمانوں کو شہید کیا تو کیا اب امریکہ مصری ڈکٹیٹر کی مدد کرے گا ؟ امریکہ جمہوریت کا حامی ہے یا بادشاہت کا ؟ امریکہ نے شام میں سنی مسلمانوں کی مدد اور حمایت کی جبکہ عراق میں امریکی اتحاد سنی مسلمانوں پر بمباری کیوں کر رہا ہے ؟

شیعوں اور سنیوں میں وہ کون سے اختلافات ہیں جن کی بنیاد پر ایک دوسرے کو قتل کر رہے ہیں یہ اختلافات مذہبی ہیں یا علاقائی ہیں ؟

جاری ہے………….

ساجد حسین ساجد۔

sajidwarind@yahoo.com